RG Kar Medical College senior doctor-te a huhoa ban tum

RG Kar Medical College and Hospital (RGKMCH)-a thawk doctor leh professor 40 chuangte chuan chaw ngheia nawrh huaihawt mek, junior doctor-te an thlawpna lantir nan Thawhlehni khan a huhoin banna lehkha an thehlut.

Senior doctor-te chuan doctor nuar mekte thil phut chuan ngaihsak leh ngaihpawimawh a hlawh lo niin an sawi a, a rual a banna hi sorkarah thlen a ṭul kan ti a, a ṭul a nih chuan mimal hna aṭang pawha ban an inhuam thu hi an lehkha thehluhah an tarlang.

Lehkha hi thehlut mah se an hna an chawlhsan nghal mai dawn lo a, damlo enkawl hna chu aṭul ang zela an la thawh rih tur thu RGKMCH senior faculty chuan a sawi. Junior doctor-te hian thla hnih liamta chhung khan nawrh huaihawtin an duhna te an thlen tawh a, tunah chaw ngheiin an ngiatte puitlin turin an chhunzawm leh mek a ni.

West Bengal-a doctor-te chuan August 9-a RGKMCH-a pawngsual leh inthahna thleng duh lohna lantir hian kawng hrang hrangin lungawi lohna an lantir a, doctor thah tak tana rorelna dik an phut bakah, an hnathawhna hmunahte an himna tur ngaihtuahsak turin sorkar an phut a ni. Inrinni liam ta aṭang khan doctor pasarih chuan an thil phut nawrna atan hian chaw an nghei ṭan bawk.

Senior faculty te a ruala ban an tum vang hian RGKMCH principal Kumar Bandhopadhyay chu State Secretary in a ko nghal a ni. State secretary hian doctor nuar mekte chu an thil ngiatte tihlawhtling tura hma an lak mek thu sawiin, an nawrh titawp turin a ngen.

Hetih lai hian state enkawl medical college-a thawktu dang eng emaw zat pawhin an ngenna thlen chungchangah sorkarin inbiakna a neihpui lo a nih chuan a huhoa banna thlen ve an tum thu an tarlang ve bawk.

Delhi doctor-ten chaw nghei ve

Delhi-a Maulana Azad Medical College(MAMC) a doctor-te pawhin Kolkata-a junior doctor nuar mekte an thlawpna lantirin, nimin Nilaini khan ni khat atan, zing dar 9 aṭanga tlai dar 4 thleng chaw an nghei ve.

Guru Teg Bahadur Hospital-a doctor te pawhin nimin vek khan ribbon dum hrengin an thawhpui rawng taka pawngsual leh thah tawktu hriatrengna leh nawrh huaihawtte an thlawpna an lantir a, All India Institute of Medical Sciences(AIIMS) Delhi-a Resident Doctor Association (RDA) pawh in zan dar 6 aṭangin Jawaharlal Nehru(JLN) stadium -ah 'candle march' an huaihawt bawk.

Federation of All India Medical Association (FAIMA) pawhin West Bengal sorkar laka an lungawi lohna tarlangin, "Junior doctor te thil ngiat chu ngaihpawimawh a nilo tih hre tu nih hi a lungawi thlakloh takzet a, West Bengal junior doctor te lam ah kan ṭang tlat a; himna, dikna leh chanvo nei tura an beihnaah hian an hmaah kan ding zel ang" tiin thuchhuah an siam.