Omar Abdullah-a'n J&K CM thar tur tan thurawn pe

Jammu and Kashmir assembly inthlan result, Thawhlehnia puan takah National Conference(NC) leh Congress thawkdun chuan hnehna an chang. Hnehna an chan hnuah NC party Vice President leh Chief Minister hlui ni bawk, Omar Abdullah chuan Chief Minister dinhmun luahtu tur chuan sorkar laipui leh Union Territory Lieutenant Governor(L-G) te nen a an inkar a tih ṭhat a tul hle thu a sawi chhuak.

" CM hna thawk tura nihna chelhtu tur chu Central leh Raj Bhawan te nen in kungkaihna ṭha zawk siam turin thurawn ka pe duh a, sorkarna chelh a nih hnu ah CM chuan Prime Minister, Home Minister leh minister pawimawh dangte be tura a rang thei ang bera Delhi a pan nghal chu ka beisei a ni" tiin Abdullah chuan a sawi a ni.

NC hruaitu chuan a hel zawng leh thawhpui harsa zawnga awm chuan hlawkna a neih loh tur thu sawiin, " J&K chuan kum nga lo awm tur atan politics ringawt buaipui lo a, harsatna chinfel tur tam tak a nei dawn a ni. Sorkar thar lo awm tur hian sorkar laipui nen inlaichinna ṭha zawk a neih ngei chu a pawimawh. Sorkar laipui pawhin J&K chu siamṭhat ngai dinhmunah a awm mek a ni tih chu a hmuthiam nghal dawn a ni" tiin a sawi a, NC leh Congress thawkdun chu sorkar thar siam tura inpuahchah turin a chah nghal bawk.