India-in Trachoma natna umbo thei ta

World Health Organization South East Asia Regional Director Saima Wazed chuan Thawhlehni, October 8 khan India chuan Trachoma natna chu vantlang mipui lak aṭangin a umbo ta tih a puang a, hemi pual hian citation a hlan nghal bawk.

UN Health body chuan India chu South-East Asia huam chhung ram zinga Trachoma natna umbo thei ram pathumna a ni tih a puang bawk a ni.

Trachoma natna hi bacteria in a thlen mit lam natna niin, mitdelna hial a thlen thei. Trachoma natna vang hian mihring maktaduai 1.9 lai chuan khawhmuh fiah lohna leh mitdelna hial an tawh phah tawh. Khawvel ram 42 ah he natna vang hian harsatna tawk an awm a, he natna laka invenna pawimawh ber chu tui thianghlim hman leh bawlhhlawh sawngbawlna mumal neihte a ni.

Wazed chuan, " India in he dinhmun a thleng thei hi ka lawmpui hle. Trachoma natna umbo tura vantlang hriselna an tih hmasawnna chu chhuanawm ka tih bakah sorkar hruaitute ophthalmologists lama an in sawrbingna te leh health care hnathawk tute inpumpekna vang a ni tih a hmuh theih a, lungrual taka trachoma umbo tura an thawhna hrang hrang te vang a ni tih a hmuh theih. He natnat umbo tura vantlang hnenah tui thianghlim hman leh bawlhlawh sawngbawlna leh khawsakna thianghlim a ṭul zia zirtirna leh, thianghlim inzirtirna ṭha tak pek vang a ni" tiin India in he dinhmun a thleng chu a lawmpui thu a sawi.