J&K : NC legislature party leader atan Omar Abdullah thlang

Omar Abdullah chu nimin khan National Conference (NC) MLA thlan tharte chuan an legislature party leader atan lungrual takin an thlang a, Jammu and Kashmir Union Territory chief minister a ni dawn ta.

NC president, Omar Abdullah pa ni bawk, Farooq Abdullah chuan nimin khan legislature party meeting neihah, party MLA te chuan an vaiin Omar Abdullah chu an hruaitu atana an pawm thu a sawi. Inthlan hmaa thawhpui tura inremna an lo siampui tawh party dangte chu sorkar thar din dan tur chungchangah vawiin hian meeting an neihpui leh dawn bawk.

J&K assembly inthlan neih zawh takah NC hi party mala seat la hnem ber niin, assembly seat 42 an la a ni. An thawhpui Congress party chuan seat ruk leh, CPI(M) in seat khat an la ve bawk a ni.

Chief Minister thar tur, Abdullah chuan legislature party leader atana an thlan avangin an party MLA te chungah lawmthu a sawi. Nimina meeting an neih ma hian Abdullah chuan J&K special status pekna, Article 370 tih tawp chu hman leh a phut thu a lo sawi lang tawh a, a kaihhruai sorkar thar a din hunah pawh hei hi a nawr nat hle rin a ni. Hei bakah J&K chu state puitlinga hlangkai leh turin a phut bawk.

Abdullah chuan, "Kan party chuan kan dinna tehi kan thlak mai dawn lo a, Article 370 chungchang vang hian kan ngawi reng dawn tih kan sawi heklo. Inthlan neih a nih hma aṭang tawhin vawi tam tak Article 370 lak bo hi 'mi à thiltih a nih thu leh hman a nih leh ka rin thu ka lo sawi tawh a ni," a ti.