Haryana Assembly MLA thar zinga 96% crorepati an ni

Haryana Assembly inthlan neih zawh taka MLA 90 thlan tlinte zinga 96% chu hausa tawntaw, crorepati an ni. MLA zinga 13% chu thubuai nei lai an ni bawk.

Association for Democratic Reform(ADR) leh Haryana Election Watch in MLA tharte affidavit an zirchian aṭangin, MLA zinga 44% chuan Rs vbc 10 chuang hu nei niin, Rs nuai 20 nei tling lo chu 2.2% chauh an ni.

MLA te hausakna hi chawhrualin mi pakhatin Rs vbc 24.97 hu zel nei ang an ni a, kum 2019 khan Rs vbc 18.29 hu nei ang niin, an rawn khum nasa hle.

Independent MLA, Hisar Savitri Jindal chu MLA zinga hausa ber niin, a thil neih hlut zawng hi Rs vbc 270 hu a ni a, a dawtah BJP MLA Shakti Rani Sharma leh Shruti Choudhry te awmin, Rs vbc 145 leh Rs vbc 134 hu an nei bawk. BJP MLA 96%, Congress MLA 95% leh INLD leh independent MLA 100% te chuan Rs vbc 1 hu an nei tling.

MLA 12 te chu thubuai nei lai an ni a, an zinga paruk chu thubuai lian tham nei niin, pakhat hian tualthah tuma puhna thubuai a nei mek. Thubuai nei mek zingah Congress MLA 19%, BJP MLA 6% leh independent MLA 67% an awm.

Thiamna lamah MLA thar zinga 68% chu graduate leh a chung lam niin, 29% chu Class 8-12 an ni. Hmeichhe MLA hi 14% an awm bawk a, kum 2019-a 10% awm aiin an pung a ni. MLA zinga 66% chu kum 51-80 inkar anni.

J&K MLA-ah Congres hruaitu a hausa ber

Jammu & Kashmir MLA zingah Congress party president Tariq Hameed Karra a hausa ber a, a thil neih hlut zawng hi Rs vbc 148 hu a tling.

BJP MLA Devender Sing Rana chuan Rs vbc 126 hu neiin, MLA zinga hausa ber dawttu a ni a, a pathumnaah hian National Conference (NC) MLA Mushtaq Guroo awmin Rs vbc 94 hu a nei. Hetih lai hian Aam Aadmi Party(AAP) hruaitu Mehraj Malik chu MLA zinga rethei ber niin, a thil neih hlut zawng hi Rs 29,000 chauh a ni thung.

MLA thlan zingah hian NC MLA 88%, BJP MLA 29%,Congress 100%, PDP 67% leh CPI (M) leh People Conference MLA 100% bakah independent MLA zingah 57% te chuan Rs vbc 1 chuang hu an nei bawk. MLA tharte hausakna hi chawhrualin Rs vbc 11.43 zel ang a ni. Kum 2014 inthlanah khan MLA-te thil neih hlut zawng hi chawhrualin Rs vbc 4.56 chauh a ni.