GHI 2024-ah India 'serious' category-ah awm

International humanitarian agency-ten ram hrang hranga ei leh in hrisel tlakchham dan an tehna, Global Hunger Index (GHI) 2024 report an tih chhuahah India dinhmun a ṭha lo hle. 'Serious' category-ah awmin, ram 127 zingah 105-na a ni.

An tehna aṭangin India ramah mi 13.7% chu chaw ṭha eitur nei lo nia tarlan niin, naupang kum nga hnuailam 35.5% te chu ṭhang ṭha lo an ni a, 18.7% te chuan an rih tur ang zat leh ṭhan tur ang zat an pha lo a, 2.9% te chu kum nga an tlin hma in an thi nia tarlan a ni bawk.

Kumin hi report an siam vawi 19-na niin, 'Concern Worldwide' leh 'Welthungerhilfe' ten an ti chhuak a ni. Ei tur ṭha leh hrisel khamkhawp ei lohna ram hi a la tam hle, ram rethei zual tak takte chuan kum eng emaw zat chhung chu harsatna hmachhawnna leh dona mumal an la neih loh avangin ṭam an la tuar dawn niin a tarlang.

India awmna, dinhmun ṭha lo 'serious' huang chhungah hianram 42 an awm. India hi Pakistan leh Afghanistan chungah a awm laiin, Sri Lanka, Nepal, Myanmar leh Bangladsh hnuaiah a awm thung.