NCP hruaitu Baba Siddique kah hlum a ni

Nationalist Congress Party hruaitu, Baba Siddique (66) chu Inrinni liam ta zan khan Bandra Mumbai-a a fapa, MLA Zeeshan Siddique office pawnah kah hlum a ni.

Baba Siddique hi Dusshera lawm a nih laiin misualin 9.9 mm pistol hmangin an kap a, Inrinni zan dar 11 vek khan a thisen chhuak nasa leh a hliam tuar lo in a thi tih puan a ni. Nimin khan Lilavati Hospital aṭangin Cooper Hospital-ah a ruang hi postmortem tura sawn leh a ni.

Siddique hi Maharashtra minister hlui niin a kaptu misual pathum te hi pawisa hmanga rawih an nih rin a ni. Pawikhawihtute hian silai hi vawi ruk vel an hmet puak nia sawi a ni a, Durga Visarjan puala halpuah an hal lai taka thil thleng niin, misual te silai hman hi police ten an hmuchhuak zui nghal bawk.

Maharashtra chief minister Eknath Shinde chuan he pawikhawihnaa inhnamhnawihte chu an chungah action na taka lak a nih tur thu a sawi. Khawpuia boruak ṭha leh ralmuang a awm ngei theihna tura hma lak a tiam.

Siddique thah a nih hi Mumbaia political member lian tham thahna kum 30 hnua a thlen leh vawikhatna niin, kum 1990 khan BJP MLA Ramdas Nayak leh Premkumar Sharma te chu kahhlum an lo ni tawh a, 90s ah vek hian Shiv Sena MLA Vitthal Chavan leh Ramesh More te pawh kah an lo ni tawh bawk.