SP hruaituin BJP thlawp tawh lo turin Nitish Kumar ngen

Samajwadi Party (SP) hruaitu, Akhilesh Yadav chuan Bihar chief minister Nitish Kumar hnenah socialist leader Jai Prakash Narayan (JP) pianchama thil thleng chungchanga a lungawi lohnate thlenin, Janata Dal (United)-in BJP kaihhruai sorkar a thlawpna ti tawp turin a ngen.

Jai Prakash Narayan pianchamah Yadav chuan Narayan zahna lantir tura Lucknow-a Jai Prakash Narayan International Centre (JPNIC) hmuna kal a tum chu police-in an lo dan vangin a kal thei lo a, a chenna in pawnah Narayan lim chu parṭhi a awrhtir ta zawk a ni. He hun hi SP worker ṭhahnem takin an hmanpui a ni.

Yadav chuan BJP sorkar chu thil zep ruk an neih avanga JPNIC tlawh khap leh, building chu hralh tuma a ruka hmala tu awmah a puh. Yadav chuan JPNIC chu mipui tlawh theiha tih ni mah se, hnathawh a la zo lo tia sawiin, “Building satute hnenah Rs vbc 70 an pek belh tih ka hria a, heti chung pawh hian sak zawh a la ni chuang lo,” a ti.

Samajwadi Party chuan kumtin Narayan-a piancham an lawm ziah thu sawiin Yadav-a chuan JPNIC-a police duty-te an lakchhuah hunah piancham lawmna chu an hmang leh dawn tih a sawi. Bengngawng leh ṭawngthei lo ni ṭhin khan, tunah chuan a mit a del tel tawh tiin sorkar a sawisei.

Yadav chuan Navratri leh Ram Navami lai ni lo se chu SP worker-te chuan JPNIC tlawh theih loa an hungnate chu an tihchhiat vek tur thu a sawi bawk. He thil thleng avang hian Bihar CM Kumar chu central-a sorkarna fawng vuantu BJP chu thlawp tawh lo turin a ngen.

SP hruaitu Yadav chuan Uttar Pradesh chief minister Yogi Adityanath chu kum 1970 chhoa prime minister Indira Gandhi laka a lungawi lohna a lanchhuahtirnaah Narayan thawh hlawkzia a hrechianglo hle, tiin a sawisel bawk. Security thilah ngaihṭhatlohna an nei a nih chuan, invenhimna ṭhazawk kalpui mai tur a nih laiin, JPNIC-a luh hrim hrim chu an khap thu Yadav chuan a sawi.

Lucknow Development Authority chuan JPNIC-ah hnathawh mek a nih avang leh, rannungin a tihbuai avangin Yadav chu JPNIC tlawh lo turin an ngen thu an sawi a, Ningani tlai aṭang khan JPNIC gate-te chu rangvain an khuh bawk.