Delhi leh Gujarat Police thawkdunin cocaine kg 518 leh mi panga man

Delhi leh Gujarat police te thawk dun chuan Pathianni khan Gujarat-a Ankleshwar ah cocaine kg 518 a rit leh a neitu nia rinhlelh mi panga an man.

Police chuan an mi mante hi thu an zawhfiahna aṭangin Dubai leh UK aṭanga thurawn pek ṭhin niin an tarlang.

Ruihhlo an man thar hi tun hnaia Delhi-a cocaine kg 700 an man nen in kaihnawihna nei nia tarlan niin, hei hi ramchhunga ruihhlo an man tawh zinga man tam ber nia rin a ni.

Cocaine an man tawh zawng zawng hi kg 1,289 tling tawhin hei bakah hian hydropanic hmanga enkawl Marijuana kg 40 pawh man a ni tawh bawk. Ruihhlo man tawh zawng zawng hi Rs vbc 13,000 hu a tling tawh a, ruihhlo kaihnawiha an mi man chu 12 an tling tawh bawk.

Delhi Police in an tarlan danin cocaine kg 700 an man hi Special Cell ten chhuichianna an neiha Avkar Drug Limited Company, Ankleshwar ami an dap naah man a ni. Pathianni khan Special Cell team hi Gujarat-ah kalin, company godown-ah cocaine hi an hmu chhuak a, hemi rual hian mi panga te hi an man nghal tih tarlan a ni.

Special Cell hian October `2 khan South Delhi-a Malhipur godown pakhatah ruihhlo, Rs vbc 5,620 hu leh a neitu nia rinhlelh mi pali an lo man tawh bakah, ruihhlo kaihhnawihah hian midang pahnih Amritsar leh Chennai aṭanga lo kal te man an ni bawk. Special Cell hian ruihhlo an man tam ber dawttu man lehin, cocaine Kg 208, Rs vbc 2,080 hu chu West Delhi ah Ningani liam ta khan an man a, hemi ni vek hian mi pakhat Uttar Pradesh Hapur a mi chu man nghal in, hemi kaihhnawiha mi pasarih an manna a ni.