"Bawng in then faia mutin cancer a dam thei": UP Minister

Uttar Pradesh-a BJP minister Sanjay Singh Gangwar chuan cancer natna vanga enkawl mekte chu bawng in thianfai a, bawng in chhunga an mut ṭhin chuan an natna te a dam thei niin a sawi.

Sugarcane Development Minister, Gangwar chuan BP sang damdawi ei mekte pawhin bawng chu duat taka an chul a, an enkawl chuan ni 10 chhungin damdawi ei ngai loin an awm dawn niin a sawi bawk.

Minister hian mipui chu an inneih champha te leh an fa te piancham te chu bawng ina lawm ṭhin turin a chah. He thu hi Pathiannia Pakadia Naugawan a Philibhit constituency-a bawng in hawnna a neih naah a sawi a ni. Gangwar chuan, "Miin BP sang natna a nei a nih chuan zing leh tlaiah bawng hnung chul ṭhin se, a inenkawl nana 20mg damdawi a ei ṭhin chu ni 10 chhungin 10mg ah a tlahniam thei a, hei hi enchhinna neih tawh ka hrilh che u a ni" tiin, "Cancer natna enkawl mek chuan bawng in thian faiin chutah chuan mu ṭhin se cancer chu a dam thei a, bawngek meihawl hal chuan thosi lakah min veng a, bawng in a thil pek chhuah te hi a ṭangkai vek a ni" tiin a sawi.