Lirnghing vangin India-ah 72 thi tawh Nepal chhawmdawl hna thawh chhunzawm zel

Ramchhung hmarlam leh khawchhak lama lirnghing vang­a thi chu nimin thleng khan mi 72 an tling tawh a, hliam tuar mi 288 an awm bawk. Thi zinga mi 56-te chu Bihar state ami an ni.

Uttar Pradesh-ah mi 12 thiin 70 in hliam an tuar a, West Bengal-ah 2 thiin 35 an hliam a, Rajasthan-ah lirnghing vang hian mi pakhat a thi a, midang pasarihin hliam an tuar bawk.

Bihar-a lirnghing tuarte chhanchhuah leh chhawmdawl hna thawk turin National Disaster Response Force (NDRF) team panga tirh an ni a, UP-ah team khat tirh an ni. NDRF team hian Darbhanga, Bihar aṭangin mi 180 chu hmun him lamah an hruaichhuak tawh a ni.

Sorkar laipui chuan lirnghing vanga thi chhungte hnenah ralna, cheng nuai 6 ṭheuh pek an nih tur thu a sawi.

Bihar sorkar chuan an state-a lirnghing vanga thi chhungte chu cheng nuai li a pek tur thu a puang a, Uttar Pradesh sorkar chuan thi chhungte hnenah cheng nuai sarih ṭheuh, hliam tuar na zual hnenah Rs 50,000 leh hliam na vak lo hnenah Rs 30,000 a pe dawn tih a sawi bawk.

Hetihlai hian Nepal rama lirnghing rapthlak tuarte ṭanpui leh chhawmdawl hna chu thawh chhunzawm zel a ni a, sipai leh civil thlawhtheihna hmangin mipuite chhanchhuah hna thawh a nih bakah, chhawmdawlna hmanruate thawnluh a ni. Nepal-in Inrinni chawhma lama lirnghing a tawh aṭanga darkar li hnuah ṭanpui hna thawk turin India Air Force-te chu an thawkchhuak hman a ni.

Sorkar laipuiin Nepal rama chhanchhuah leh chhawmdawl beihpui thlakna a neih mek, 'Operation Maitri' hnuaiah military aircraft 12 leh helicopter 18-te'n hna an thawk a ni. Nimin thleng khan Nepal aṭang hian mi 5,400-te chu India ramah hruai haw an ni tawh a, an zingah hian ramdang mi Nepal-a tangkhang mi 30 an tel. Foreign Secretary S Jaishankar chuan India-in ram hrang hrang hnen aṭangin an mi leh sa, Nepal rama tangkhang mekte chhanchhuah sak tura ngenna a dawn thu a sawi.

Thawhṭanni khan chhan­chhuah hna thawk tura tirh, India sipaite chuan lirnghing inṭanna, Pokhra bialah helicopter hmangin mipuite mamawh turte an thlak sak a, sipaite hian field hospital pathum siamin hengah hian member 18 awmna medical team dah an ni bawk.

Nepal-ah hian chhiatna a thlen hnuah Army medical team paruk tirh nghal an ni a, Thawhṭanni khan team paruk dang tirh belh leh an ni.

Prime Minister Narendra Modi chuan Thawhṭanni tlai khan Nepal rama lirnghing tuarte chhanchhuah leh chhawmdawl hnathawh kalpui dan thlirin meeting a ko a, hei hi Nepal rama chhiatna thleng vanga meeting a koh vawi thumna a ni. PM chuan Nepal bakah India rama state ṭhenkhata lirnghing tuarte chhawmdawl hna ṭha taka kalpui a nih theihna tura sorkar laipui leh state hrang hrangte thawh hona ṭha neih a ngaih thu a sawi a, hei bakah hian Nepal rama chhawmdawlna thawnluh chhunzawm dan tur pawh an sawi ho bawk. Modi chuan Nepal rama lirnghing vanga hliam tuarte chu a ṭul a nih chuan India ramah enkawl an ni ang, a ti.

Lok Sabha MP-te chuan an thla khat hlawh ṭheuh chu Nepal ram ṭanpuina atana pek an tum. Nimina Lok Sabha inkhawmah Parliamentary Affairs Minister M Venkaiah Naidu chuan he rawtna hi siamin, eptu member-te pawhin lungrual takin an lo pawm a ni.