Delhi-ah Wi-Fi hotspot 1,000 siam a ni dawn

Delhi-a rorellai, Aam Aadmi Party chuan nakkum February thlaah chuan Delhi khawpui chhungah Wi-Fi hotspot 1,000 siam a tum tih a sawi a, Delhi Transport Corporation (DTC) bus 5,000 tan pawh Wi-Fi pek a tum bawk.

Delhi sorkar leh Delhi Dialogue Commission Wi-Fi Task Force te'n ni thum chhung inbiakna an neih hnuah he thu hi puan a ni a, an inbiaknaah hian system integrators, original equipment manufacturer (OEM), hardware leh software provider, ISP leh Telecom operator chungchangte an sawi ho a ni.

Sawihonaah hian Delhi Deputy Chief Minister Manish Sisodia, DDA vice chairman Asish Khetan, Parliamentary Secretary Adarsh Shastri leh Chief Secretary KK Sharma-te pawh an tel.

IT department official-te chuan AAP sorkar kum khat champha, nakkum kumtir lamah Wi-Fi hotspot hi pekchhuah an tum thu a sawi a, kumtinin a coverage pawh tihzauh an tum dawn tih an sawi.

Hetihlai hian Delhi law minister, Jitender Singh Tomar-a'n Tilak Manjhi Bhagalpur University aṭanga law degree nei anga a insawi chu university chuan record-ah a lan loh thu a sawi. University hian Delhi High Court-ah affidavit thehlutin, Tomar-a certificate chu siamchawp a nih thu leh a tarlang. Kum 1999, July 29 khan Sanjay Kumar tih hnenah provisional certificate, serial number 3687 an pe chhuak a, Tomar-a'n a roll number nia a sawi pawh chu a dik lo a ni, a ti.