Rahul-a'n loneitute hmu turin relin Punjab a pan

Congress vice-president Rahul Gandhi chuan hunbi loa ruahsur nasa avanga harsatna tawk mek, loneitute dinhmun enfiah turin nimin khan relin Punjab a pan.

Rahul Gandhi chuan Punjab-a loneitute'n harsatna an tawh dante chu a hmun ngeiah kala en a duh thu a sawi.

BJP kaihhruai NDA sorkarin land bill siam danglam a tumna chu sawichhuakin, Congress hruaitu chuan, "Land Acquisition Act hi central issue a ni. Ram tana ei tur petute hnen aṭangin ram te chhuhsak an ni. Punjab-ah kalin loneitute dinhmun ka zirchiang dawn a ni," a ti.

Rahul hian Khanna leh Gobindgarh market te tlawhin, state grain market dinhmunte a enfiah tur thu a sawi. Khanna market hi Asia rama grain market lian ber zinga mi a ni.

Congress party chuan sorkarin loneitute thlai thar a leisak ṭha lo hle niin a sawi a, ruahsur nasa avanga loneitute'n chhiatna an tawh chung­chang report dik tawk lo pe­chhuakah a puh bawk. Congress vice president hian NDA sorkar chu lonei­tute ngaihthah a, mi hausa leh sumdawng liante zawkte duhsakna lantirah a lo puh tawh bawk.

Punjab Chief Minister Parkash Singh Badal chuan a minister ṭhenkhatte nen an state chhunga loneitute'n harsatna an tawh mek chung­chang chu ngaihven a, an harsatna sutkian dan tur ngaihtuah pui tura phûtin Prime Minister Office kawtah nawrh an lo huaihawt tawh bawk.