ECI-in Maharashtra leh Jharkhand inthlan hun tur puang

Election Commision of India(ECI) chuan Maharashtra leh Jharkhand-a assembly inthlan neih hun tur chu nimin, October 15, 2024 khan a puang.

Maharashtra Assembly term kal mek hi kumin November 26 ah a tawp anga, Jharkhand hi nakkum January 5, 2025 ah a tawp ve thung dawn a ni.

ECI chuan Maharashtra-ah hian inthlan hi thawh khata neih a nih tur thu a puang a, vote thlak ni atan November 20 a ruat. Nomination thehluh theih hun hnuhnung hi October 29 niin, nomination endikna hun atan October 22 ruat a ni a, inhnuhdawh theih hun hnuhnung ber hi November 4 a ni. November 20-ah vote thlakin November 23-ah vote chhiar a ni ang.

Jharkhand-ah inthlan hi thawh hniha kalpui a ni dawn thung a, November 13 leh November 20-ah vote thlak a ni ang. Nomination hi October 25 leh 29 thlengin a thehluh theih dawn a, inhnukdawk duhtan October 20 leh November 1 thleng hawn a ni ang. Vote chhiar hun hi Maharashtra nen in angin, November 23-ah chhiar a ni dawn a ni.

Maharashtra leh Jharkhand assembly inthlan neih hun tur puan a nih rual hian Wayanad, Kerala-a Lok Sabha by-election neih hun tur puan a ni nghal bawk. He bial hi Congress party hruaitu, Rahul Gandhi-a'n a chhuahsan tak kha a ni. November 13-ah by-election hi neih a ni ang a, Maharashtra leh Jharkhand ang bawkin November 23 ah vote chhiarin result puan a ni ang.