Delhi-NCR in Anti-pollution Plan Stage 1 hmang ṭan
Delhi leh a chhehvela boruak bawlhlawh zual zel chuan ziaawm lam a pan theihloh avangin, Centre air pollution control panel chuan Delhi-National Capital Region(NCR) huam chhunga state sorkar inkaihhruaina hmasa ber tur Graded Response Action Plan(GRAP) chu hmang ṭan tur in a ti. He inkaihhruaina thar hi Stage 1, 2, 3, 4 ah ṭhen an ni.
Dussehra leh kut hrang hrang hman a nih hnuah Delhi Air Quality Index(AQI) chuan nimin, Thawhlehni zing dar 6.20 khan 281 kaiin, khawpui boruak bawlhhlawh zingah pasarihna a tling pha hial a ni.
Boruak a lo thianghlim theihna tura GRAP kaltlanga hmalakna an duan chhuah hi Delhi-NCR ah nimin zing dar 8 aṭang khan hman ṭan tura tih a ni.
Stage 1(AQI 201-300) kaihhruaina:
* Hunbi neia kawngpui phiahfai leh tuia theh.
* Insakna leh a chhehvela vaivut lengvel thei tur tih tlem.
* Bawlhhlawh sawngbawlna mumal neih.
* Lirthei aṭanga khuchhuak endik, traffic kaihhruaina mumal siam. Industry, power plan, leh brick siamna aṭanga bawlhlawh paih dan mumal tak siam.
* Bawlhhlawh ualau taka hal khap, diesel generator hman bithliah, leh eisiamna hmunah thing leh lungalhthei hman loh.
* Boruak ti bawlhhlawh tute lakah social media kaltlanga rang taka complaint siamna 311 APP, Green Delhi App, SAMEER App te hman ṭangkai.
* Kawngpuia motor tih tlem nan pisa kai tur ten aruala hman theih chi lirtheite hmang uar tura zirtirna pek.
* Kut lawmna chi reng reng ah eco-friendly zawnga hman leh halmawi te ti tlem tura zirtirna in pek.
Nakkum January 1 thleng halmawi khap
Delhi Environment Minister Gopal Rai chuan khawpui boruak bawlhhlawhin ziaawm lam a pan theih loh avangin, nakkum January 1 thleng khawpui leh a chhehvelah halmawi hrang hrang siam chhuah, zawrh leh hmante khap a nih thu a puang. Mipuite chu sorkar thuchhuah zawma ngai pawimawh turin a chah.
Delhi Pollution Control Committee (DPCC) chuan halmawi leh a kaihhnawih hrang hrang khap chungchanga kaihhruainate ti chhuakin, inkaihhruaina kengkawh tur hian Delhi police te chu thuneihna pek an ni. DPCC hnenah hnathawhna report te thehlut ṭhin tura tih an ni bawk.