India leh Canada inkar boruak a chhe zel

Canada chuan an rama Sikh inlakhran duhtu pawl hotu, Hardeep Singh Nijjar thah a nih chungchanga inhnamhnawiha puhin an rama Indian diplomat parukte chu a hnawtchhuak ve leh. India chuan India rama Canada high-ranking diplomat parukte a lo hnawtchhuak ve tawh bawk.

Sikh pawl hotu, Nijjar thah a nih chungchangah India leh Canada boruak hi a ṭha lo hle. Canada prime minister Justin Trudeau chuan Canada ram chhunga Nijjar thah a nihnaah hian Indian agent te an inrawlh ngei tih finfiahna ṭha tak a nei niin a lo sawi tawh a ni. Thawhṭanni khan mipuite himna tiderthawng zawnga chetnaah hian India sorkar agent-te an inrawlh tih chiang takin an hre leh nia sawiin, an rama Indian diplomat parukte hnawhchhuah an nih thu hi a puang a ni. Canada rama thil sual tihnaa India a inrawlh chu thil dik lo, pawmzam mai theih a ni lo tiin a sawi.

Canada foreign affairs minister Melanie Joly chuan, " Canada mite himna hi sorkar mawhphurhna lian ber a ni a , midang pet chhuak tura thutlukna kan siam te hi finfiahna ṭha tak nena siam a ni. India sorkar chuan hnuchhuina kalmekah ram pahnihte tan a hlawkna a awm theih nan min pawm pui turin ka ngen a ni," tiin X ah a tarlang ve bawk.

Hetih lai hian India chuan Trudeau puhna hi a pha a, Nijjar thah a nih chungchanga Canada-in a chhui dan chu a pawm loh thu sawiin, Canada PM chu he thil thleng hi politics khelhna hmanruaa hmangah a puh thung.

Ministry of External Affairs (MEA) chuan CanadaPrime Minister hian a kaihhruai sorkar hnuaiah tharum thawhtu leh helpawl te tan hmun zau tak siam sakin, hei hi Indian diplomat leh hruaitu dang, Canada-a awm te beihnan leh tih buai nan an hmang ṭhin a ni, tiin a tarlang.