J&K CM atan Omar Abdullah la lut

Jammu and Kashmir Chief Minister thar turin National Conference(NC) vice president Omar Abdullah chu nimin Nilaini, October 16 khan rinawmna thutiam tiam tira lak luh a ni ta.

Chief Minister thar lak luhna hun hi Sher-i-Kashmir Convention Centre(SKICC), Srinagar ah neih a ni. CM thar rual hian a Council of Minister tur te lak luh nghal an ni bawk a, Deputy Chief Minister(DCM) atan Surinder Kumar Chouddhary lak luh a ni.

J&K Lieutenant Governor Manoj Sinha chuan CM leh minister-te hi a la lut a ni.

Omar Abdullah hian 2009 hnuah a term hnihna turin Chief Minister dinhmun hi a chelh leh dawn ta a ni. "Kum ruk chhung atana CM ni thei hnuhnung ber ka ni a, Union teritorry pahnih a J&K ṭhen a nih hnua CM ni thei hmasaber ka ni bawk a ka hlim hle. Mahse, Union teritory a CM nih chu a dan adang deuh dawn a, union teritorry pawh hi reilo te chhung chauh a nih ka beisei a ni," tiin thutiam a lak zawha thu a sawiah a tarlang.

Chief Minister lawmluhna inkhawm hi India hmun hrang hranga hruaitu ten an hmanpui a, an zingah hian Lok Sabha Leader of Opposition Rahul Gandhi, Congress party president Mallikarjun Kharge bakah Priyanka Gandhi ten tel puiin, Samajwadi Party President leh Uttar Pradesh CM hlui Akhilesh Yadav, CPI(M) hruaitu Prakash Karat leh, MP Kanimozhi Karunanidhi leh Supriya Sule pawh an tel bawk.

J&K inthlana NC in a thawhpui, Congress party chuan sorkar thar dinah hian minister dinhmun an chuh pui dawn loh thu sawiin, sorkar chu a chhung aṭang ni loin a pawn aṭanga an thlawp tur thu an sawi.