Ruahsur nasa vangin Chennai-ah sorkarin chawlh puang

Chennai leh a chhehvelah Thawhṭanni aṭang khan ruah nasa takin a sur a, ruahsur hian khawpui chungah harsatna a thlen nasa hle. Thawhlehni khan sorkar chuan sorkar pisa leh zirna in hrang hrang tan chawlh a puang a, mahse ruah a la sur chhunzawm zel avangin nimin khan chawlh a puan chhunzawm leh.

Thawhlehnia Chennai-a ruahsur hi ṭum danga ruahsur aiin 2000% chuangin a tam a, hei vang hian khawpui chhungah tui a tling nasa a, rel service pawh a bahlah phah a ni. October 1-10 chhunga ruahtui tla hi 281.1 mm niin, ṭum danga an dawn dan tlangpui chu 82.9 mm a ni.

Ruahsur nasa avanga zirna in chawlh a nih chhung hian online class pawh nei lo turin School education Minister Anbil Mahesh Poyyamazhi chuan a chah. IT firm a hnathawk te pawh chu October 15-18 chhung chu chenna in aṭanga hna thawh phalsak turin a ngen bawk

Tamil Nadu chief minister MK Stalin chuan Thawhṭanni khan ruahsur vanga harsatna thleng thei te laka in venna tur te ngaihtuah turin thuneitu lam chu thurawn a lo pe tawh a, National Disaster Responce Force(NDRF) leh Tamil Nadu Disaster Response Force te chu ruahsur vanga harsatna thlen mai theihna hmunah te alo thawn chhuak lawk tawh a ni.

State sorkar thurawn angin Greater Chennai Corporation chuan civic body te chu pump 990, tractor tui pumpna nei 57, leh mechanise boat 36 te chu rikrum thila hman theih tura in ralring turin a ti a, relief center 931-ah damdawi leh eitur te hman mai theiha dah lawk turin hrilh an ni bawk.