Canada-ah India mi zin an pung

Canada leh India inkara buaina awmin zual lam a pan zel leh, ram hruaitute inkarah in beihna awm mek karah India mi, Canada tlawha zinte hnena visa pek chhuah chuan hniam lam aiin pun lam a pan zawk thu Canada sorkar data chuan a tarlang.

Kumin January aṭanga July thla inkarah Canada chuan India mi hnenah visitor visa(V-1) 3,65,750 pe chhuakin hei hi nikum hemi hun chhunga India mi hnena visas-an pek chhuah 3,45,631 aiin a tam zawk tih Immigration, Refugees an Citizenship Canada(IRCC) data aṭangin a hmuh theih.

IRCC in a tarlan danin V-1 visa hi Canada-a chhungkua leh ṭhiante tlawh tum leh khualzin cham rei lo turte tana an pek chhuah ṭhin a nia, hei hian zirlai, hnathawk, leh diplomats tana visa an tih chhuah ṭhin chu a huam tel lo a ni. Visitor visa pek chhuah hi pung mah se India zirlai tana visa an pek chhuah ṭhin chu kuminah 1,37,455 ah tlahniamin, nikum lamah chuan Indian zirlai 1,86,970 hnenah Canadian study permit hi pek chhuah a ni.

India leh Canada te inkar hi nikum September-a Canada prime minister Justin Trudeau-a'n Canada a in bengbel Khalistan pawl Sikh intihhran duh pawl hruaitu Hardeep Sing Nijjar thah a nih chungchangah, India sorkar mi leh sa inhnamhnawihna nei an awm nia a puh avangin a chhe chho a ni. India chuan he puhna hi thubelhchian dawl lo leh pawm tlak lo tiin a pha thung.