Rahul Gandhi-a'n Prime Minister 'Make in India' policy a sawisel

Congress vice president Rahul Gandhi chuan nimina Lok Sabha inkhawmah Prime Minister Narendra Modi-a 'Make in India' policy chu sawi­selin, he policy hi loneitute tawrhna thlen a, sumdawng lian leh hausa zawkte hlawkpuina tura siam a ni, a ti.

PM Modi-a ramdang a tlawh chu kap zuiin Rahul chuan, "Tunah hian PM hian India a tlawh mek a, Punjab pawh tlawh vein lonetute'n harsatna an tawh mekte chu a hmunah enfiah rawh se," a ti. Rahul hian Thawhlehni khan Punjab-a loneitute'n harsatna an tawh mek chu a hmunah kalin a enfiah a, sorkar lapuiin loneitute thlai thar a lei ṭhat sak loh chung­chang sawichhuakin, "Loneitute thil thar chhuah chu India-a siam a ni ve lo em ni?" tiin a zawt.

Hunbi loa ruahtui tla leh rialin loneitute thlai tam tak a tihchhiatsak laiin, sorkar laipui chuan pui turin engmah a ti lo tiin Rahul chuan a sawi bawk.

Nimin tlai khan Rahul Gandhi hi Maharashtra-a Vidarbha a pan dawn a, he hmun hi harsatna tawh vang­a loneitu tam tak intihhlum tawhna hmun a ni. Rahul hian loneitute harsatna tawh mek vanga lungawi lohna lantir turin vawiin hian kein km 15 a kal dawn bawk.

Rahul Gandhi chuan BJP kaihhruai NDA sorkar­in land bill siam danglam a tumna dodal turin a bei zel dawn tih a sawi a, sorkar laipui chu sumdawng liante duhsakna lantir a, industry an dinna tura loneitute ram chhuhsak tumah a puh.