Delhi Police-te'n Gajendra intihhlum chhanah AAP a puh
Delhi Police-in kar hmasaa Aam Aadmi Party (AAP) in Jantar Mantar, Delhi-a rally an huaihawt laia loneitu, Gajendra Singh inawhhlum chungchang a chhuina report, Union Home Ministry hnena a thehluhah
AAP leh rally-a tel mipuite chu vanduaina thlen chhanah a puh.
Delhi Police report chuan AAP hruaitute hian rally-ah mipuite chawk thinur thei zawngin thu an sawi a, mipui pungkhawmte pawhin midangte fuihpawrh zawnga chein, hei hian Gajendra hi inawhhlum duhna khawp rilru a puttir phah a ni, a ti.
Gajendra Singh thih dan hi Delhi Police-te hian an chhui chiang mek a, a thih hma darkar 24 chhunga a awmdante hriat tumin an bei mek a, a mobile phone data-te enfiah a nih bakah, a hmun tlawhte leh a mi biakte hriatchhuah tumin an bei mek a ni.
AAP-te'n Jantar Mantar-a rally huaihawt an tum hi Ram Lila Mandir-a sawn turin Delhi Police-te chuan an hriattir a, mahse an ngenna hi an ngaih pawimawh sak lo tih an sawi. Hei bakah Delhi-a AAP sorkarin Gajendra intihhlum dan chhui chiang tura a ruat, New Delhi district SDM chuan police-te hnenah Gajendra ruang chu post-mortem lo turin a ti niin an sawi.
NDA sorkarin land bill siam danglam a tumna duh loin, AAP hian April 22 khan Delhi-ah rally an huaihawt a, rally an neih lai hian Rajasthan aṭanga kal, Gajendra Singh hi rally neihna bula neem kungah a inawkhlum a ni.