Law Degree lem neia puh, Delhi minister insawifiah turin CM-in a phut

Delhi Chief Minister Arvind Kejriwal-a chuan a law minister, Jitender Singh Tomar chu law degree lem neia puh a nih chungchangah insawifiah turin a hriattir.

Minister-in Bihar university, Tilak Manjhi Bhagalpur University aṭanga law degree nei anga a insawi chu university chuan record-ah a lan loh thu a sawi. University hian Delhi High Court-ah affidavit thehlutin, Tomar-a provisional certificate chu siamchawp a nih thu a sawi a, a certificate-a serial number chu university record-ah chuan hming dang daih hnenah pek a ni, a ti.

Kum 48 mi, Tomar hi minister a nih ṭum khatna a ni a, CM Kejriwal-a council of minister atana ruat a nih aṭang khan a educational qualification chungchangah zawhna tam tak a tawng tawh a ni.

Tomar chuan an puhna chu thu dik lo a nih thu sawiin, a degree pawh chu dik taka a neih a ni a, a finfiahna tur document pawh a nei vek tih a sawi. Eptute'n minister a nihna aṭanga bang tura an phutna chu hnawlin, Tomar chuan dawta puh a nihna chu ban phahna tur a ni lo, a ti.