Operation Maitri chhunzawm zel a ni

Nepal rama lirnghing tuarte chhanchhuah leh chhawmdawl hna thawka India sipaite'n beihpui an thlakna, Operation Maitri chu chhunzawm zel a ni.

Foreign Secretary S Jaishankar chuan Indian rescue mission hnuai­ah Nepal aṭang hian India mi 5000 chuang chu Air Force leh civil thlawhtheihna hmangin hruai haw an ni tawh tih a sawi. Hei bakah hian ramdang mi 170 pawh an hruaichhuak tel bawk a, heng mite US, UK, Russia leh Germany mite an ni.

Major Genral Ranbir Singh, ADG (Military Operation) chuan Nepal ram mipuite ṭanpuina hna an thawh mekah hian an thawh hunbi tur bituk a la ni lo tih a sawi.

Hetihlai hian ram­chhung hmarlam leh khawchhak lama lir­nghing vanga harsatna tawkte chhawmdawl hna pawh ngawrh taka thawh chhunzawm zel a ni. Ramchhung­a lirnghing tuar nasa ber, Bihar state-ah chuan mi 58 an thi a, hliam tuar mi tam tak an awm bawk. Darbhanga Medical College and Hospital (DMCH)-ah chuan lirnghing vanga hliam tuar an enkawlte chu an chalah 'bhukamp' (lirnghing) tih inziak an bel sak a, hei hian mipui thin a ti ur hle.

Mipuite'n an lungawi loh thu an sawichhuah hnu hian District Magistrate chuan damlote chala sticker belsak an nih dan hi chhuichiang turin hriat­t­irna a tichhuak nghal.