India leh Canada buai vangin Sikh mite dinhmun derthawng: NAPA

"Hardeep Singh Nijjar thihna thleng avanga India leh Canda inkara ram pahnih thawhdunna buai chho ta chuan Sikh mi pem lutte dinhmun a ti derthawng mek a ni," tiin North American Punjabi Association(NAPA) chuan nimin Zirtawpni khan an sawi. Nijjar hi India aṭang inlakhran duhtu, Khalistan movement hotu a ni.

NAPA Executive Director Satnam Singh Chahal chuan,"He thil thleng hian Sikh mi pem lut chhungkuate inkiltawihna a tihzual phah a; an nihna, politics ngaihdan, leh vantlang in pawhtawnnate a ngawng nasa" tiin a sawi bawk.

India chuan kartir khan Canadian diplomat paruk chu lo hnawtchhuak tawhin, hemi rual hian Canada khawpui Ottawa-a High Commissioner Sanjay Kumar Verma pawh a ko kir tawh. Hei hi Nijjar thah a nih chungchanga India in hnamhnawih nia Canada-in a puhna kal zel vang a ni.

Nijjar hi nikum June thla khan Surrey, British Columbia-ah kah hlum niin, Chahal chuan he thil thleng hian Canada a Sikh pemlut te inkarah in ṭhendarhna chu a chhe zawngin a nghawng zual tih a sawi. "Mi ṭhenkhatin Canada sorkar chu human rights humhim duh angah ngai mah se, mi ṭhenkhat ve thung chuan India thuneihna dodal tum angin an ngai ve bawk" a ti.

US-in Indian official tualthat tuah puh ve leh

US Department of Justice chuan Indian official, Vikas Yadav chu nikum nipui laia Khalistani tihhran duhtu pawl mi leh sa, Gurpatwant Sing Pannun thahnaa inhnamhnawihna neiah a puh ve leh.

He thil thleng hian India leh US inkarah aṭha lo zawnga boruak a sosan leh hlauhthawnna a siam a ni. Hei hi Hardeep Singh Nijjar thihnaa Canada-in India official-te rinhlelhna an neih nen a inzul hle bawk.

Hetih lai in India chuan Yadav an puhna te chu phain, an puhna chhan hi thu belhchian dawl lo a ni, a ti. Yadav hi Cabinet Secretariat-ah Indian Foreign Service and Research and Analysis Wing tan thawk niin, a hma chuan field officer angin CRPF ah alo thawk tawh ṭhin a ni.