Eptute'n Delhi Law minister ban an phût

Delhi-a eptu party, Congress leh BJP chuan law degree lem siama puh, Delhi-a AAP sorkara Law Minister Jitender Singh Tomar chu bang turin an phût.

Congess worker-te hian nimin khan Delhi Chief Minister leh a cabinet minister-te office awmna, Delhi Secre­tariat panin kawng an zawh a, police-te'n an lo dang a ni. Party worker-te hian kaltlang luih an tum avangin police-te hian water canon-te an hmang bawk.

Kawngzawh hi Delhi Congress hotu, Ajay Maken-a'n a ho a, Tomar hi cabinet minister a nihna aṭang paih a nih hma chuan bang tura an nawr chhunzawm zel tur thu a sawi.

Maken chuan, "Law Minister hi ban nghal turin kan phût a, Delhi Chief Minister Arvind Kejriwal pawh he thil hi a mawhphurhnaa laa Delhi CM a nihna aṭanga bang turin kan phût bawk. AAP chuan politics thianghlim lantir an intiam a, mahse tunah pawh dik lo taka thiltitu chu hum an tum leh si a ni," a ti.

BJP pawhin Tomar hi bang tura phûtin, Chief Minister Kejriwal-a office kawtah nawrh an huaihawt tawh bawk. Dawt hmanga certificate siamtu, a minister chu ban a, jail-a khung turin Kejriwal-a chu an phut thu an sawi.

Tomar-a'n law degree a neihna nia a sawi, Bihar-a Tilak Manjhi Bhagalpur university chuan Nilaini khan Delhi High Court-ah affidavit thehlutin, Tomar-a provisional certificate chu siamchawp a ni a, an institution record-ah a hming chuanna a awm lo tih a sawi. Hetihlai hian minister chuan a degree chu a dik ngei a ni tih sawiin, finfiahna tur document pawh a nei vek niin a sawi thung.

Bihar university-in Tomar-a certi­ficate chu a lem a nih thu a sawichhuah hnuah, nimin khan RTI zawhna chhannaah minister undergraduate degree pawh chu a lem a nih thu sawichhuah a ni. Faizabad-a Dr Ram Manohar Lohia Avadh University leh affiliated institute pakhat, KS Saket Postgraduate College, Ayodya ami chuan Tomar-a B.Sc second year marksheet chu a lem a ni, a ti. College chuan kum 48 mi Tomar hian an institution-ah admission pawh a ti lo a, a marksheet-a roll number series inziakte chu a lem vek niin, vice-chancellor signature pawh chu a original ami nen a in ang lo hle, a ti.