Sorkarin NDRF battalion din belhna tur a pawm

Sorkar laipui chuan National Disaster Res­ponse Force (NDRF) thuam chakna turin mi 2,000 awmna tur, battalion pahnih din belh a tum.

Prime Minister Narendra Modi-a kaih­hruai union cabinet meeting chuan he rawtna hi pawmin NDRF unit thuam chak a nih tur thu hi a sawi. Tunah hian NDRF hian battalion 10 a nei mek a, Nepal rama lirnghing tuarte leh ramchhung state ṭhenkhata lirnghing tuarte chhanchhuah leh chhawmdawl hna an thawk mek a ni.

NDRF battalion din thar tur pahnih hi Varanasi leh Arunachal Pradesh-ah dah an ni ang.

Parlamilitary force hrang hrang aṭanga lakte awmna, NDRF hi ramchhunga khuarel emaw, mihring siam chhiatna a thlena thawk chhuak hmasa ber an ni ṭhin a, hetiang huna che chhuak thei tur hian ramchhung hmun hrang hrangah unit-te hi dah an ni. NDRF battalion tinah hian mi 1,149 an awm a, chhiatna a thlen thulha chhanchhuah hna thawhna atana hmanrua pawimawh nena thuam vek an ni.