Coal scam: CBI-in mi 15 lakah thubuai a ziak lut

Central Bureau of Investigation (CBI) chuan coal scam kaihhnawihah mi 15 lakah thubuai a ziak lut a, an zingah hian Congress hruaitu leh industrialist Naveen Jindal, Minister of State for Coal hlui Narayan Rao, Jharkhand Chief Minister hlui Madhu Koda te an tel.

CBI hian thubuai hi Amarkond Murgadangal coal block scam kaih­hnawihah a ziak lut a ni. Private firm- Jindal Steel and Power Ltd leh Jindal Realty Pvt Ltd pawh thubuai siamsak zingah hian an tel a, IPC section 120-B (crimi­nal conspriracy) leh 420 (cheating) bakah, Prevention of Corruption Act hnuaiah thubuai hi siamsak an ni.

Special court chuan dik lo taka thiltihnaa in­hnamhnawiha Jindal-a puh a nih hnua a pass­port an hrensak loh avangin CBI a hau a, inhnam­hnawiha an puhte chu ang khat veka en turin a ti. CBI hian thubuai an thehluh hnu hian Jindal-a passport hi an laksak lo nia sawi a ni.

Special CBI Judge Bharat Parashar chuan, "Thubuai ziahluh a nih tawh chuan, CBI chuan an mi rinhlelhte chu passport chu an laksak nghal vek tur a ni. Mahse ṭun ṭumah hian enge a chhan kan hriat ve lohin policy dang an lo hmang a ni," a ti.

Court chuan Jindal leh midangte thubuai ngaihtuah hun atan hian May 6 a ruat.