Rahul-a'n padyatra a nei

Congress vice presi­dent Rahul Gandhi chuan nimin zing khan Maharashtra-a Vidarbha biala Amravati dsitrict-ah padyatra a nei a, kilo­metre 15-a thui kea kalin loneitu, harsatna an tawh avanga intihlum chhungte a hmu nghal bawk.

Gandhi hian Nilaini zan khan Nagpur a thleng a, nimin zing khan padyatra nei tur hian Gunji khaw lam a pan nghal a ni. Gunji a panna kawng lakah mi tam tak chu Congress hruaitu hmuh tum hian an lo intlar a ni. Gandhi hian amah hmuaktute hi biain, harsatna an neihte a zawt nghal bawk.

Congress hruaitu hian Gunji leh Ramgaon inkarah thingtlang khaw panga a tlawh a, heng khuaahte hian hun bi lo ruahsur nasain an thlai a tihchhiatsak, loneitute hmuin an dinhmunte a zawt chiang ang. Rahul Gandhi hi MPCC pre­sident Ashok Chavan leh state congress hruaitute'n an ṭawiawm.

Maharashtra hi ruah­tui tlak hun dik lo leh rialtla avanga loneitute'n harsatna nasa tak an tawhna state zinga pakhat a ni a, Amravati division-ah hian kuminah harsatna tawh vangin loneitu eng emaw zat an intihlum tawh a ni.

Rahul Gandhi chuan NDA sorkar chuan sum­dawng liante chauh a ngaihsak a, loneitu leh mi harsa zawkte dinhmun chu a ngaihthah a ni tiin, Vidarbha-a loneitute tawrhna chu a hriatpui avanga tlawh a nih thu a sawi.