Mayawati-in UP CM bang turin phut

Bahujan Samaj Party (BSP) hotu Mayawati chuan Bulandhshahr-a nu leh a fanu tleirawl pawngsual rawn an nih chung≠changah Uttar Pradesh Chief Minister Akhilesh Yadav chu dan leh thupek kengkawh zo loah puhin bang turin a phut.

Kar kalta Zirtawpni zan khan National Highway 91-ah Noida aṭanga Shajahanpur pana kal, car pakhat chu misual rualin beiin, mipa awmte chu an phuarbet a, nu leh a fanu hi car aṭanga hruai≠chhuakin an pawngsual rawn a ni. An pawngsual hnuah an thil neihte an laksak zui bawk. He thil thleng avang hian UP-a rorellai, Samajwadi Party sorkar chu eptuten na takin an bei a ni.

Police-te chuan mi 15 man tawhin heng mite hi thu zawhfiah mek an ni. An zinga pathum chu pawng≠sualtute zingah hian an tel tih finfiah a ni tawh a, National Security Act (NSA) hnuaiaih thubuai siamsak an ni ang. Police-te chuan eptu pawlten an che chak tawk lo nia an puhna chu thu dik lo a ni tiin, pawikhawihna thlen thu an hriat aṭanga minute 20 chhung≠a a hmun an thlen hman thu an sawi.

Pawikhawihna thlenna hmun hi police post aṭanga km 100 vel chauha hlaa awm a ni a, police-te demna hrang hrang a awm avangin state sorkar chuan local police hotu leh officer pasarih a suspend tawh.

BJP pawhin UP state chhung kawngpuiahte venhimna lam ngaihthah puhin SP sorkar a sawisel a, Union Minister Mahesh Sharma chuan, "Hetianga pawikhawihna thleng
ṭhin hi engtikah nge a reh ang? He thil thleng hian state sorkar hlawhchhamzia a tilang a, hmeichhiate zahawmna pawh a humhim sak zo lo a ni. Thil zahthlak tak a ni a, state sorkar hi a bang tur a ni" a ti.

Nakuma state assembly neih tura Congress party chief mi≠nister candidate, Sheila Dikshit-i pawhin CM chu bang turin a phut a, "He thil thleng hi a zahthlakin a pawi takzet a, police-ten he thubuai hi an chingfel thei lo a nih chuan state chhunga dan leh thupek dinhmun chhiat zia a lantir a, state mipuite chuan an state-ah ngei him tawh loin an inhria a ni" a ti.