Swaraj Abhiyan-in political party thar din dawn

Swaraj Abhiyan hruaitu Yogendra Yadav leh Prashant Bhushan-te chuan Ocotber 2 hian political party thar an din dawn tih an sawi a, hemi atan hian member paruk awmna committee pawh din a ni tawh a ni.

Yadav leh Bhushan-te hi party sawisel zawnga thu an sawi avangin nikum khan Aam Aadmi Party (AAP) aṭangin hnawhchhuah an ni. Party
aṭanga hnawhchhuah an nih hnu hian an mahni thlawptute nen meeting neiin, kum 2015 April 14 khan political organization, Swaraj Abhiyan hi an din zui ta a ni. He pawl hi kawng hrang hrang - political, economical, social leh cutural lama mipuiten an dikna chanvo an hmuh theih nana beitu tur a ni tih an sawi.

Swaraj Abhiyan hian India rama loneituten an dikna chanvo an hmuh theihna turin ram pum huapin beihpui an lo thlak tawh a, kum 2015 December thla khan Prashant Bhushan chuan Supreme Court-ah Swaraj Abhiyan hming hian PIL thehlutin, ramchhunga khawkheng tuartu state-a public distribution system kaltlanga buhfai, be lam chi leh chini semchhuah kawngah, national food security law, 2013 anga kalpui a nih theih nan court chu inrawlh turin a lo ngen tawh a ni.

Political party thar din an tum chung≠chang hi sawiin Yadav chuan, "Politics lama inleh kan tum hi a ruka tih a ni lo. Political party din tur hian Swaraj Abhiyan national convention-a palai kalkhawm zinga 93% in an remti a ni. Palai 433 zingah 405-ten party din hi an duh a ni" a ti.

Yadav chuan political party din ni mah se, Swaraj Abhiyan chu kalpui zel a la ni dawn tih a sawi, political party din thar tur nen chuan kalphung hrang daih an ni dawn tih a sawi. Hetih lai hian an party din thar hmang hian nakuma state panga-a assembly inthlan neihna turah an chuh dawn leh dawn loh erawh an la sawichiang duh lo.