Covid-19 kai enkawl dam nuai 33 chuang tawh

India ramah Covid-19 kai nasa takin an pung zel a, Pathianni leh Thawhṭannia report an tihchhuahah phei chuan ni khata hri kai hmuh chhuah thar sing kua chuang a zawnin an awm hial.

Nimina Ministry of Health and Family Welfare report tihchhuahah erawh hri kai hmuh chhuah thar zat tlemin a tlahniam hret a, mi 75,809-in hri an kai tih hmuh chhuah a ni. 

India ramah hian chhinchhiah chinah Covid-19 kai mi 42,80,422 an awm tawh a, khawvel ram hrang hrang zinga Covid-19 kai tamna ram pahnihna ni tawhin heng zinga  8,83,697 chuan hri an la kai mek a ni. 

Darkar 24 chhungin dama puan mi 73,521 lai an awm leh a, hemi nen hian hri kai tawh zinga 33,23,950 chu an dam leh tawh a, mi 1,133 lai an thih leh vangin hri vanga thi mi 72,772 an awm tawh bawk. 

Hri kai enkawl dam tawh rate hi 77.65% a ni a, hri kai mek rate hi 20.65% niin 1.70% in an thihpui a, hri kai mek aiin enkawl dam hi a let 3.8 velin an tam zawk a ni. 

Health ministry chuan ram chhunga Covid-19 vanga thi zinga 70% chuang chu a hmaa natna benvawn lo nei sa an nih thu a sawi. 

Maharashtra chu state zingah hripui vanga thi tamna ber niin mi  26,604 an thihpui tawh. 

Tamil Nadu-ah 7,836, Kar­nataka-ah 6,393, Delhi-ah 4,567, Andhra Pradesh-ah 4,417 leh Uttar Pradesh-ah coronavirus vanga thi hi 3,920 an awm tawh a ni. 

Sample Vbc 5 test tawhIndian Council of Medical Research (ICMR) chuan nimina report an tihchhuahah Thawhṭanni khan sample 10,98,621 an endik leh tih tarlangin, hri len ṭantirh aṭanga nimin thleng khan sample 5,06,50,128 an endik tawh tih an tarlang. 

ICMR hian sample endikna tura laboratory pawmpui 1,668 an nei tawh a, 1,035 chu sorkar laboratory niin 633 chu private laboratory a ni thung.