Dam chhung tang turin Abu Jundal hrem

Mumbai-a special Maharashtra Control of Organised Crime Act ( MCOCA) court chuan Lashkar-e-Taiba member, 26/11-a Mumbai khawpui beihna ruahmantua puh, Sayed Zabiuddin Ansari, Abu Jundal tia hriat bawk leh midang parukte chu kum 2006-a Aurangabad-a ralthuam ruk thubuaiah thiam loh chantirin, dam chhung tang turin a hrem.

Aurangabad aṭanga ralthuam tam tham tak rukchhuah thubuaiah hian mi 22-te chu kar kalta Ningani khan court chuan thiam loh a lo chantir tawh a ni.

MCOCA court judge SL Anekar chuan ralthuam ruchhuaktute hian kum 2002-a Gujarat-a intualvuakna rapthlak tak thleng chung≠changah, hetih laia Gujarat Chief Minister Narendra Modi leh VHP hruaitu Praveen Togadia-te beihna tura an tih a nih thu a sawi. Mahse an pawikhawih tumna hi an lo hriatruk avangin Maharashtra Anti-Terrorist Squad (ATS) chuan an lo dang thei a ni.

Kum 2006, May 8 khan squad hian Aurangabad bula Chandwad-Manmad Highway-ah Tata Sumo leh Tata Indica car chu lo changin, Mohammed Aamir Shakil Ahmed, Mohammed Juber Sayyed Anwar leh Abdul Azeem Abdul Jameel Shaikh alias Raja-te chu an lo man a ni. Tata India car hi Abu Jundal-an a khalh a, mak tak maiin ATS team lak aṭang hian a tlanchhe hman a ni. ATS team hian a hnuah Tata Indica hi an zawngchhuak leh a, computer CPU-a dah RDX kg 30 bakah, AK-47 assault rifle 10 leh silai mu 3,200 an man a ni.

Jundal hi kum 2006 May thla khan Bangladesh-ah a kal a, heta ṭang hian passport lem hmangin Pakistan-ah a lut leh a ni. Kum 2008 November 26-a Pakistan firfiakten Mumbai khawpui an beih ṭum khan, Jundal hian Pakistan-a control room aṭangin firfiakte hi an tih turte hriattirin alo kawhhmuh nia sawi a ni.

Jundal hi Saudi Arabia-ah man a ni a, kum 2012 khan India ramah rawn thawn a ni. Aurangabad-a ralthuam rukchhuah thubuai bakah, 26/11-a Mumbai beihna thubuai siamsak a ni bawk.