Gujarat CM Patel-i a bang dawn

Gujarat Chief Minister, BJP hruaitu Anandiben Patel-i chuan CM a nihna aṭanga ban a tum thu sawiin, November 21-a kum 75 a tlin hma ngeiin amah thlaktu tur thlang turin BJP a ngen.

Anandiben Patel-i hian ban a tum thu hi a Facebook-ah a ziak a, a kum upat tawh vanga ban tum a nih thu a sawi. "Party in kalphung kan neihah, kum 75 tlingte chuan ṭhalai zawkte tan hmun an kian ang tih a ni a, November thla khian kum 75 ka tling tawh dawn a ni" a ti. Thla hnih kalta aṭang khan amah thlaktu tur ngaihtuah turin party a ngen tawh tih a sawi.

Hetihlai hian BJP chuan Gujarat CM hi thlak tumin thla hmasa khan thutluka an siam tawh nia sawi a ni a, Prime Minister Narendra Modi-a'n a thlaktu tur hi a thlang dawn a ni. Thla eng emaw zat kalta aṭang khan Patel-i hi a hna tlin loah puhin sawisel a tawk fo a, nakkumah state assembly inthlan hmabak an nih avangin party hruaitu zingah CM thlak duhtu hi an awm nual nia sawi a ni.

Anandiben Patel hian an state chhunga harsatna lian tak thleng mek pahnih, Patel hnamte nawrhna leh Dalit mite kutthlak an nih avanga lungawi lohna lantir mek chungchang thunun zo loah puh a ni. Tualchhunga BJP hruaitute chuan kum 25 dawn BJP-in ro a lo rel tawhna state-ah Anandiben Patel-in thuneihna a chan hnuah an party dinhmun a hniam chak hle niin an puh bawk.

Patel-i thawhpui hnaivai ṭhenkhat chuan a hna tlin loa puhna chu party chhunga amah ertuten an phiarrukna nia a ngaih thu an sawi. Kum hnih kalta khan Patel-i hi PM Modi-a'n Gujarat CM tura a thlan chhuah a ni a, hetihlai hian an state rorel dan leh inrelbawl dan chungchangah BJP president Amit Shah inrawlh danah mi tam tak an lawm lo hle nia sawi a ni bawk. State official-te chu an state mamawh an thlen dawnah CM niloin, Shah-a hnenah kaltlang zawk tura tih an ni ṭhin niin an sawi bawk. Patel-i hi bang turin nawr ni lo se chuan, a piancham a thlen dawn hnaih teah chauh ban a lo tum nia sawi a ni bawk.

Hetihlai hian AAP hruiatu leh Delhi Chief Minister Arvind Kejirwal-a chuan Patel-i banna chhan chu, Gujarat-a AAP a len chak em avang leh a hlauh vang a ni, a ti. AAP-in Gujarat-a BUP rorelna dik tawk loh zia beia, campaign a neih avangin BJP chuan a hlauthawng a, eirukna umbo tura an party in a beihna chu Patel-i ban phahna chhan a nih thu a sawi.

Congress vice president Rahul Gandhi pawhin Anandiben Patel-i banna hian, Gujarat-a BJP dinhmun chu a chhanhim zo dawn lo tih a sawi. Gujarat-a buaina chungchanga mawhphurtu chu kum hnih chauh CM dinhmun chelhtu Patel-i ni loin, kum 13 chhung Modi-a rorelna hnuaia an lo awm tawhna vang a ni, a ti.

Gujarat Chief Minister thlaktu atana rin zingah state health minister Nitin Patel leh Gujarat BJP chief Vijay Rupani-te chu hming langsar zual an ni.