SC-in BJP hotu laka petition thehluh a hnawl

Supreme Court chuan BJP national president Amit Shah-a lakah petition thehluh chu a hnawl.

Kum 2005-a thu dik lo hmanga Sohrabuddin Sheikh beih a nih chungchangah, National Advisorty Council (NAC) member hlui leh social activist Harsh Mander chuan BJP president lakah hian petition a thehlut a, mahse court chuan he thubuaiah hian Amit Shah hi a fihlim tih a finfiah tawh avangin petition hi a hnawl ta a ni.

Gangster Sheikh leh a nupui, Kauser Bi-te hi kum 2005 khan Hyderabad aṭanga Sangli, Maharashtra pana an kal laiin Gandhinagar bulah thah an ni.

Tualthahna thleng chungchanga Amit Shah-a laka thubuai thehluh chu kum 2014 December 30 khan Mumbai sessions court chuan a lo titawp tawh a ni. Mander hian session court thutlukna siam hi sut turin Bombay High Court-ah a thlen a, mahse HC chuan kumin March thla khan Mander-a ngenna hi a lo hnawlsak leh tawh bawk.

SC bench-in Mander-a petitoin a ngaihtuahnaah hian Mander aiawhin a ukil, Kapil Sibal a ding a ni. Sibal chuan Sohrabuddin Sheikh-te nupa thah thubuaiah hian CBI-in chargesheet a siamah pawh Shah hi rinhlelh zinga a 16-na a ni, a ti.