Parliament-ah paper ballot chauh hmang dawn

Parliament monsoon session, September 14 - October 1 chhunga neih turah, vote lak ngaih hunah electronic voting system hman a ni dawn lo a, paper ballot hmang chauhin vote lak a ni dawn. 

Ramchhunga hripui leng mek avangin Parlia­ment member-te pawh fimkhur tura tih an ni a, hri darh tur venna atan social distancing norms pawh khauh taka kenkawh tum a ni. Member-te inhlata awm tura tih an nih avangin an ṭhut dan tur pawh ruahman lawk a ni a, Parliament in hnihte hian rorel hi a hrana neiin hemi hunah hian MP-te chu House pahnih leh gallery-ah an ṭhu dawn a ni. 

Session neih turah hian sorkar laipui chuan ordinance 11 pass ngei a tum a, heng zingah hian farm sector lam kaihhnawih pathum bakah session hmasaa bill tihkhawtlaite an tel. 

Lok Sabha secreta­riat-in hriattirna a tih­chhuahah, vote lak a ngaih hunah pawh memberte hi an ṭhutna hmunah 'Ayes' leh 'Noes' tih ziahna paper, English leh Hindi-a ziah chu pek an ni mai dawn tih a sawi. Vote thlak duh loa hai duhte pawhin 'abstention' tih ziakna lehkha an dil thei ang, a ti.