Sputnik V phase 3 clinical trial India-ah neih tum

Russia sorkarin a pawm tawh, Covid-19 vaccine hmasa ber tura ngaih, 'Sputnik V' chu India-ah tun thla hian phase 3 clinical trial neih pui tum a nih thu Russian Direct Investment Fund's (RDIF) head Kirill Dmitriev chuan a sawi. 

India bakah hian Saudi Arabia, United Arab Emirates (UAE), Philippines leh Brazil-ah pawh trial hi neih tum a ni bawk. Phase 3 trial hi kumin October leh November thla chhunga a preliminary result hriat hman tum a ni. 

India hi nimin piah aṭanga khawvela Covid-19 hri kai tamna ber ram dawttu a nih chhoh tak avangin, Russia siam Covid-19 vaccine-a clinical trial neih mek hi a ngaihven phah hle niin media-te chuan an tarlang.

Russia hian Covid-19 vaccine siam chhuah thuai a tum a, vaccine a siam hi clinical trial hrang hrangah enchhinna neih chhoh mek zel a ni. Mahse World Health Organisation (WHO) chuan kar liam ta Zirtawpni khan thuchhuah siamin, vaccine hi ram hrang hrang ten siam mah se a him tawk em tih finfiahna neih a nih loh chuan an pawm dawn loh thu a tarlang a ni.