India economy ṭhang nasa vangin ramdang investor an lawm: PM

Prime minister Narendra Modi chuan nimin, Thawhṭanni khan 21st Century hi 'India Century' a nih thu NDTV World Summit-ah sawiin, India economy a ṭhang nasa a, hei hian khawvel ramdanga investor liante a tilawm hle tih a sawi.

NDTV World hawnnaah hian PM Modi chuan," India nasa taka a ṭhan chhohna chu thlirin khawvela ṭhang duang ber, infrastructure lamah pawh ṭhang duang tak a ni. Khawvel huap pawha rating agency-te pawhin India ṭhan chhoh dan tur chu an dah sang hle a ni," a ti. Khawvel investor liante pawhin India ṭhanna chu zirin khawvela sumdawnna ṭhangduang taka invetsment tih chu an chak hle tiin a sawi bawk.

Prime Minister hian khawvel huap investor lian Mark Mobius pawh sawi langin,global fund manager-te chu India stock market-ah te chuan an fund aṭanga 50% tal chu invest turin thurawn a pek thu a sawi.

India stock market hian kum 10 liam ta chhung khan 22,300 aṭangin 81,000 ah kai chhoin, India economy chuan GDP USD trillion 1 ni turin kum 63 chhung, independence aṭanga kum 2010 chhung a mamawh thung. Mahse USD trillion 2 tling tur hian kum sarih chauh duhin kum 2017 ah a tling chho a, 2020-ah USD trillion 3 a tling a ni. Kum 10 chhungin India chu khawvela economy lian ram 11-na aṭangin panganah a inhlangkai pha a ni.

PM Modi chuan sawi belhin, "India a ṭhan chuan, khawvel pawh aṭhang a ni" a ti a, India ram ṭhannaah hian a ṭha lo zawng thil engmah a awm loh thu te, India chuan ram zawng zawng deuh thaw chu inṭhian ṭhatna ṭha a neih pui avangin a ṭhannaah hian ramdang pawh a hruai tel zel thu a sawi lang bawk.