J&K-ah helpawlin mi 7 kap hlum

Jammu and Kashmir-a Ganderbal district-a private company hnathawha huam chhung camp camp site chu Pathianni khan helpawl mi nia hriat silai kengten an pawng kah a, mi pasarih an kap hlum. An zingah hian tualchhung mi doctor a tel a, tualchhung mi ni lo hnathawka awm mi panga an tel bawk.

Inbeihna hmunah hian security force-te thleng nghalin, helte hain hnathawkte beihna atana an hman INSAS automatic rifle chu an kalsan a ni. Company motor pahnih pawh an halsak bawk. Inbeihna thlen dan hi chhui chian mek a nih avangin, a hnaih vaiah journalist te kal phal a ni rih lo tih police-te chuan an sawi.

J&K chief minister Omar Abdullah chuan hnathawkte beihna thleng chu mi dawihzepte thiltih a ni tiin, helai hmuna hnathawkte hi project pawimawh tak tana thawk an ni a ti a, ralthuam keng lo leh pawisawi lo te beihna chu a dem tak zet tih a sawi.

Lieutenant governor Manoj Sinha pawhin inbeihna thleng chu a dem thu sawiin police, army leh security force-te chu he pawikhawihna tenawm tak thlentute zawng leh manchhuak ngei tura zalenna pek an nih thu a sawi bawk a ni.