Meghalaya-in sakhaw biakna hmun October-ah hawn tum

Meghalaya sorkar chuan an state chhunga Covid-19  leng chuan ziaawm lam a pan chho a nih chuan, October thla chawlhkar hmasa berah sakhaw biakna hmun hrang hrangte chu hawn a tum. 

Chief minister Conrad Sangma hoin meeting neihnaah hemi chungchang hi an rel a ni. Meeting-ah hian deputy chief minister Prestone Tynsong bakah sakhaw hrang hrang pawl aiawhte an tel. 

Deputy CM chuan sakhaw biakna hmun hawn dan chungchang ngaihtuah tur hian hian chief secretary kaihhruai, sakhaw pawl hrang hrang aiawh awmna sub-committee din a nih thu a sawi. He committee hian sakhaw biakna hmunte hawn theih an nih hnua  standard operating procedures (SOP) hman turte pawh an duang dawn a ni, a ti. 

State sorkar hian June 14 aṭang khan inkaihhruaina dan siam­in sakhaw biakna hmuna service neih hi a lo phalsak tawh bawk. Kaihhruaina a siamte pawh thawn chhuakin, kum 65 chung lam, naupai lai leh naupang kum 10 hnuai lam, natna benvawn neite erawh chu an kal phalsak a ni lo. 

A kalte pawhin social distancing dan zawm tur a ni a, feet 6 dana awm vek tur niin, thermal screening neih zel tur a ni a, hmai tuamna hmang chauh luh phalsak an ni bawk. Mahse he hriattirna tihchhuah a nih hnuah an state-a hri kai an pun chhoh zel avangin he thupek hi sut leh a ni.