Kolkata-a junior doctor ten chaw ngheia nawrh ti tawp

West Bengal khawpui, Kolkata-a RG Kar Medical College and Hospital-a August 9 a an doctor pui pawngsual leh rawng taka thah a nih vanga chaw ngheia nawrh huaihawt mek, junior doctor-te chuan chief minister Mamata Banerjee inbiakna an neih hnuah Thawhṭanni zan aṭang khan an nawrh an ti tawp.

Junior doctor-te hian eng emaw chen lungawi lohna kawng hrang hranga an lan tir hnuah, an beisei leh ngiatte sorkar lam in ngaihthah leh ngai pawimawh lo nia an hriat avangin October 5 aṭang khan tiam chin awm loa chaw nghei hi an ṭan a ni. Nawrh huaihawt vang hian doctor paruk vel chu damdawi-inah dah luh ngaiin an awm phah a ni.

Lungawilohna lantir junior doctor leh West Bengal CM Mamata Banerjee te chu Thawhṭani tlai khan darkar hnih chuang inkawmin, junior doctor te chuan an thil ngiat hrang hrang te an thlen.

Hei bakah hian an hnathawhna hmuna dikna chanvo an neih nan leh intih buaina awm ṭhinte a rehna tura an beih chu chhunzawm zel an tum thu an sawi lang bawk. Chaw ngheia nawrh an huaihawt chu pawl hrang hrangin titawp tura an ngen thu sawiin, an thil phutte chu kawng danga nawr zel an tum thu an sawi.

Junior doctor-te aiawhtu, Dr Debasish Halder chuan doctor thah tak chhungte leh, khawtlang mipuiten ngenna tam tak an dawn avangin tiam chin awm loa nawrh an huaihawt chu an ti tawp tih an sawi. An thil phut chungchangah thuneitute lam chuan ṭawngkamin ṭha tak leh beiseina neiin an siam reng a, mahse a takah erawh an dan a dang niin a sawi. Meeting an neihnaah pawh hian 'we want justice' badge chu vuah phalsak an ni lo niin a sawi bawk.