Delhi boruak thianghlim theih nan GRAP Stage 2 hmang ṭan

Tun hnaiah Delhi Air Quality Index (AQI) a ṭhat loh chhoh leh tak avangin, Commission for Air Quality Management (CAQM) chuan boruak bawlhhlawh ti ziaawm turin Graded Response Action Plan(GRAP) stage two chu nimin zing aṭang khan a hmang ṭan.

System of Air Quality and Weather Forecasting and Research (SAFAR) data-a alan danin, nimin zinglam dar 8 bawr khan Delhi boruak bawlhhlawh tehna chuan 317 kaiin hei hi "very poor" category a ni. AQI tehnna 0-50 hi 'Good' niin, 51-100 'Satisfactory', 101-200 'Moderate', 201-300 'Poor', 301-400 'Very Poor', 401-450 'Severe", leh 450 chunglam chu "severe plus' tihte in boruak bawlhhhlawh dante hi ṭhen an ni.

India Meteorological Department (IMD) chuan Delhi-a nitin boruak dinhmun chu 'very poor' dinhmunah hian awm rih tura ngaih niin a sawi. Hei hi Delhi bulhnai, Haryana leh Punjab-a thil hal khu nasa lutuk ten a nghawng tel nia rin a ni bawk.

GRAP stage two ah hian lungalhthei leh thing tuah bakah diesel generator hman te chu Delhi-National Capital Region huam chhungah hian khuahkhirh leh zual a ni ang.

October 15-a Stage One an hman khan hunbi neia kawngpui phiah leh tuia phuh te, in sak leh hnathawhna hmuna leinawi leng vel tih tlem, pawna hnawmhnawk hal leh eisiamna hmun a lungalhthei leh thing tuah hman te khap a lo ni tawh bawk.

Mipuite chu veivah nana vantlang hman tur bus te hmang uar tura an chah bakah, leinawi khu siam thei chi chu October - January thleng ti tlem turin a phut tel a ni. Lirthei chhuak vak tih tlem nan parking fee ti sangin, metro service leh bus service te tih pun tum a ni.