Sorkar laipuiin US report a pawm lo

US sorkarin an rama sakhaw zalenna kaihhnawiha report a siama India chungchang a tarlan dan chu BJP kaihhruai NDA sorkar chuan pawm loin, na takin a sawisel.

United States Commission on Interna­tional Religious Freedom (USCIRF) chuan Ningani khan 2015 annual report a tichhuak a, hetah hian India chu a zawna a kum sarihna atan Tier 2 list-ah a dah.

Report-ah hian India rama zakhaw zalenna chungchang sawiselna tarlan a ni a, sakhaw tlem zawkte'n beih an tawh dan te, Hindu nationalist group- Rashtriya Swayamsevak Sangh (RSS) leh Vishva Hindu Parishad (VHP) te'n tihluihna hmanga Hindu sakhuaa mi an inlehtir dante a sawilang a ni.

"Inthlanpui neih a nih aṭang khan, rorellai BJP nena inzawmna nei politician-te chuan sakhaw tlem zawkte nek zawngin ṭawngkam mei nei leh huatthlala tak tak an sawichhuak fo a, inbeihna leh sakhaw inlehluih tirna pawh a thleng fo a ni," tiin report chuan a tarlang.

Report-a India tarlan a nih dan chu na taka bei letin, External Affairs thupuangtu Vikas Swarup chuan sorkar laipui chuan he report hi a pawm dawn lo a ni, a ti. Ministry of External Affairs (MEA) thuchhuah chuan, "USCIRF report siam hian India chanchin, a ram danpui leh khawtlang nunte a hriat tlem zia a tilang a ni," a ti.

India rama sakhaw zalenna rahbeh a nih dan a tarlan rualin, USCIRF report chuan Prime Miniser Narendra Modi-a'n sakhaw tinte zalenna vawn himsak a tiam chungchangah a fak thung.

USCIRF hian kum 2014, December thlaa Hindu nationalist group-in Uttar Pradesh-a Kristian chhungkaw 4,000 leh Muslim chhungkaw 1,000, Krismas nia Hindu sakhuaa tihluihna hmanga inlehtir an tumna, Ghar Wapsi program an siam chungchang te a tarlang a, hei bakah hian RSS chuan Muslim chhungkaw eng emaw zat chu sum lama ṭanpuina an pe dawn tia dawt hrilhin an ko khawm a, Hindu sakhaw hruaituin Hindu-a a lo lakluh chungchang te, he thil thleng hi chhui mek a nih thute a tarlang tel.