Maha sorkarin truck hnunga 'Horn OK Please' tih ziak a khap

Truck hnunga 'Horn Ok Please' tih an ziah ṭhin chu Maharashtra sorkar chuan an state chhungah a khap.

State transport co­mmi­ssioner Mahesh Zagade chuan Ningani khan truck hnunga thu­ziak khapna thupek hi tihchhuakin, "Horn OK Please emaw "Blow Horn" tih thuziah hian ṭul loah motor khalhtute chu horn tiri ngam tura phalna a pe a, horn tihrik lohna tur, silent zone- hospital, school leh college bulah te pawh horn tihrik a awm fo a ni. Hei vang hian motor-ah he thu ziah hi kan khap tawh dawn a ni," a ti.

Maharashtra sorkar thupek hi transporter association ṭhenkhat chuan ṭha an tih thu an sawi. All India Motor Transport Congress pre­sident hlui, Bal Malkit Singh chuan he ṭawng­kam hi kawng chep leh zim laiah motor-te an intlan pelh theihna tura hman ṭhin a nih thu a sawi. "Kum eng emaw zat liamtaah khan kawngte chu a zimin a chep hle a, hei vang hian a hma zawk tlante an pelh dawnin a hnunga motor lo tlanin horn a tihrik a ngai ṭhin. Mahse tunah chuan hei hi a ngai tawh lo. Kawng a zau tawh a, four lane leh six lane te a ni tawh a, driver-te chuan an inpelh dawn pawhin horn tiri loin light leh indicator-te an hmang thei dawn a, horn tihrik kher hi a ngai tawh lo a ni," tiin a sawi.

Sorkar thupek tih­chhuahah hian, 'Horn OK Please' tih ṭawngkam chu Maharashtra Motor Vehicle Rules section 134(1) palzutna lian tak a nih thu tarlan a ni . Transport official-te chuan kar leh aṭangin state chhunga truck leh sumdawnna lirthei dangahte he thu ziak hi a awm leh awm lo enfiah hna thawh ṭan a ni dawn tih a sawi a, an motor hnunga lo la ziak lui an awm a nih chuan sum chawitir an nih bakah, an permit thlenga hrensak theih an ni dawn tih an sawi bawk.