Tomar-a'n Arvind Kejriwal-a hnenah insawifiahna a thawn

Delhi Law Minister Jitender Singh Tomar chu law degree lem siama puh a nih avangin eptu pawl, BJP leh Congress party chuan bang turin an phut a, mahse nimin khan minister hian Chief Minister Arvind Kejirwal-a hnenah an puhna chungchanga a insawifiahna a thawn.

CM Kerjiwal-a hnena lehkha a thawnah, Tomar chuan, "BJP hian mi tihchhiat an tum a ni," tiin, degree lem neia an puhna chhan chu RTI-a complain thehluttu leh BJP-in roll number dik lo an pek vang mai a ni, a ti.

Tomar-a'n law degree a neihna nia a sawi, Bihar university chuan Delhi High Court hnenah Tomar-a pro­vi­sional certificate chu siamchawp niin, university record-ah a lang lo tih a sawi.

Mahse Tomar chuan a lehkha thawnah hian a graduate ngei tih finfiahna tur original marksheet pawh ala kawl vek tih a sawi a, Bhagalpur-a Vishwanath Singh Institute of Legal Studies aṭanga law degree a neih finfiahna pawh a nei tih a sawi. Hei hi court-in hriattrina a pek college nen erawh a inang lo.