Netanyahu-a'n PM Modi lawmthu a hrilh

Israel Prime Minister Benjamin Netan­yahu chuan Prime Minister Narendra Modi-a hnenah Nepal rama lir a nghin hnua Israel mi awmte hruaichhuahna kawngah India-in a puih avangin lawmthu a hrilh.

Ningani khan Israel PM hian PM Modi hi telephone-a biain, Nepal aṭanga Israel mite hruaichhuah an nih theihna atan India-in helicopter a pek avang te, Israel thlawhtheihna India rama an ṭum phalsak an nih avang tein lawmthu a hrilh a ni.

Netanyahu chuan Nepal leh India rama lirnghing vanga India mi thi chhungte leh hliam tuarte a tawrhpui thu a sawi. Israel PM hian a hmain an ram tlawhtu, Maharashtra Chief Minister Devendra Fadnavis kaltlangin PM Modi hi Israel tlawh turin a lo sawm tawh bawk.