BJP President-in ṭawng fimkhur turin party hruaitute a chah

BJP President Amit Shah chuan tun hnaia Haryana Agriculture Minister O P Dhankar-a'n loneitu, an thlai chinte a chhiat avanga beidawnga intihlumte 'mi dawihzep' tia a sawi a thlawp loh thu sawiin, party hruaitute chu an thusawi danah fimkhur turin a chah.

Amit Shah chuan, "Mi­nister Dhankar thusawi hi ka pawm lo a ni. Hei hi chu a mimal ngaihdan a ni a, party ngaihdan a ni lo. Party hruaitute chuan hetiang hawi zawnga thusawi hi an ti tur a ni lo," tiin journalist-te zawh­na a chhannaah a sawi.

BJP minister Dhankar-a'n lonei­tu intihlumte chung­chang a sawi dan hi eptute chuan na takin an sawisel a, minister a nihna aṭanga ban an phut a ni.

BJP President hian New Delhi-a press conference a neihah hemi chungchang hi a sawi chhuak a ni.

Amit Shah chuan nikum November 1 aṭang rampuma membership drive an neih chu Ningani zan khan a tawp ta tih sawiin, BJPchuan member vaibelchhe 10.5 vel neiin, khawvela political party lian ber a ni, a ti. Party member tharte tan hian mass contact program pawh an huaihawt chho leh dawn tih a sawi bawk.