UN-in Lakhvi chungchang ngaihtuah a tiam

United Nations Security Council (UNSC) committee chuan sorkar laipui hnenah Mumbai khawpui beihnaa a ruahmantu bera puh, Pa­kistan firfiak Zaki-ur Rehman Lakhvi chungchang chu meeting a neih leh hmasak berah ngaihtuah a tiam.

Laskhar-e-Taiba (LeT) hruaitu Lakhvi hi Pakistan court chuan jail aṭangin a chhuah a, hei hi dan palzutna a ni tiin sorkar laipui chuan UNSC hi inrawlh turin a ngen.

Lakhvi chhuah zalen a ni hi 26/11-a Mumbai khawpui beih a nih ṭuma a tuartute hmusitna a ni tiin, sorkar laipui lung a awi lo hle. Hei bakah hian Lakhvi hi a thil neih leh sum lakluhnate khawi chet theih loha dahsak a nih avangin sum leh thildang pawh engmah a dawng thei lo a ni, a ti. Lakhvi hi firfiak list-ah telh a nih avangin a bail-na atana sum dah pawh dan palzutna a nih thu a sawi.

India-in inrawlh tura a ngenna hi chhangin, UNSC al-Qaida sanctions committee ambassador Jim McLay chuan committee meeting leh hunah ngaihtuah a nih tur thu hi a sawi a, mee­ting hi ni reilo te hnuah neih rin a ni.

Committee chuan kum 2008, December thla khan Lakhvi hi LeT leh al-Qaida nena inzawmna nei, firfiak list-ah a lo telh tawh a ni.

Kum 2008, November 26-a Mumbai khawpui beihnaah khan mi 166 an thi a ni. He thil thleng ruahmantu leh pawikhawihtua puhin Lakhvi leh midang parukte chu thubuai siamsakin man an ni a, an thubuai hi kum 2009 aṭang khan ngaihtuah a ni. Mahse April 9 khan Pakistan court chuan Lakhvi hi jail aṭangin a chhuah a, hei hi India chauh ni lo, ramdang pawhin an sawisel nasa hle.