Priyanka Gandhi-in Wayanad by-election atan nomination theh lut

Congress general secretary Priyanka Gandhi Vadra chuan a nuṭapa, Rahul Gandhi bial chhuahsan tak, Kerala-a Wayanad biala Lok Sabha by-election neih tura chuh turin nimin khan nomination a thehlut ta.

Priyanka hian nomination a thehluh hma hian Kalpetta, Wayanad-ah road show a nei a, he hunah hian a nu Sonia Gandhi, a nuṭapa Rahul Gandhi, a pasal Robert Vadra, Congress president Mallikarjun Kharge bakah central leh state-a party hruaitu eng emaw zatin a ṭawiawm.

Roadshow zawh hian vantlang inkhawm buatsaihah Priyanka Gandhi chuan kum 1989 khan kum 17 mi chauh nia a pa, Rajiv Gandhi tana vote zawnga campaign a neih pui thute a sawi. Pungkhawmte hnenah Wayanad aiawh tura an thlang tling a nih chuan atan chawimawina ropui tak a nih tur thu sawiin; leimin vanga chhiatna nasa tak an tawh, huaisen taka an hmachhawn chungchangah chhuanawm a tih thu a sawi bawk.

Vantlang inkhawmah hian Rahul Gandhi pawhin thu a sawi a, Wayanad mipuite tan chuan unofficial MP a ni zel dawn tih sawiin, a farnu chu an thlan tling a nih chuan Parliament-ah an aiawh tur MP pahnih an nei dawn tihna a ni, a ti. Congress party president Mallikarjun Kharge chuan Priyanka Gandhi chu an thlang tling a nih chuan an tan hna ṭha takin a thawhsak ngei dawn a ni, tiin a sawi ve bawk.

Priyanka Gandhi hi a nu leh a nuṭa tan Lok Sabha inthlanpuiah kum eng emaw zat chu a lo campaign ve tawh ṭhin a,tun ṭum hi inthlan a chuh ve ṭum khatna tur a ni thung. Kumina Lok Sabha inthlanpui neihah khan Rahul Gandhi chuan Wayanad bialah leh, Uttar Pradesh-a Rae Bareli bialah a chuh a, hmun hnihah hian thlan tlin ve ve niin, Wayanad bial zawk hi a chhuahsan a ni.