Mipui tel loin India hi economy ṭhang duang ber a ni theilo: Sitharaman

Union finance minister Nirmala Sitharaman chuan ramchhung mipuiten digital infrastructure an hman uar avangin India chuan economy ṭhang duang ber nih theihna dinhmun a luah theih thu a sawi.

Minister Sitharaman hian Thawhlehnia Wharton Business School, University of Pennsylvania-a thu a sawinaah he thu hi sawiin, "India mipuite hnena zau zawka digital thil hman theih tura chhawp chhuah chu hmanraw thil tithei tak a ni a, technology-a in siamrem zel thei turin thil ṭha a thlen a ni" tiin a sawi. Mipui tam tak hnenah digital kaltlanga hlawkna leh chhawr ṭangkai theihna nasa tak a thlen theih phah thu a tarlang bawk.

Sitharaman chuan economy ṭhanlenna tura digital infrastructure pawimawhna a sawi a,"Vawiina India in khawvela economy ṭhangduang ber dinhmun a luah theihna chhan chu mipui ten man chawi ngai loa digital infrastructure an hman theih vang te a ni," a ti.

Digital Public Infrastructure (DPI) kaltlanga India mi ten kawng hrang hranga hmasawnna an neih dan te chu Finance Minister hian tarlangin, hmun kilkhawra chengte pawhin hemi kaltlanga sorkar kaihhnawih thil pawimawh an lo hriat ve zung zung theih te thu te a sawi. "Inzirtirna leh hrilhhriatna duante chu an khawtual ṭawng ṭheuhin an lo hre ve zel thei a ni" a ti. India in digital governance a neih ṭhat dan chu G20 president dinhmun a chelh chhung khan khawvel huapin pho lan a ni tih a sawi bawk.