PM-in Agra Metro project thawh ṭanna tur a hawng

Prime minister Narendra Modi chuan nimin khan Agra Metro project thawh khatna thawh ṭanna tur chu virtual-in a hawng a, hetih lai hian Uttar Pradesh chief minister Yogi Adityanath chu a hmunah a awm thung.

Narendra Modi chuan project thawh ṭanna tur a hawnnaa thu a sawiah sorkar hmasa chu beiin, ramchhunga hmasawnna tur hnathawhna kawnga buaina lian tak awm ṭhin chu project puan a ni ringawt a, a thawhna tur sum ngaihtuah lam ngaihthah a ni leh ṭhin a, chumi avang chuan project pawh kum tam tak tihkhawtlai a ni ta ṭhin a ni, a ti. "Kan sorkar erawh chuan project thar a ngaihtuah rualin a thawhna tur sum pawh a tifel nghal ṭhin a ni," a ti. 

Modi chuan kum ruk an sorkar hnuah ramchhung hmun hrang hrangah metro line km 450 aia thui hman theiha an buatsaih tawh thu leh km 1000 vel an buatsaih leh mek thu a sawi.

Local tourism lama hmasawn a ṭul thu sawiin infrastructure neih ṭhat leh inkalpawhna ṭha chu tourism sector-in an chhawr ber tih sawiin, a ngaihdanah chuan tourism chu mi tinin sum an thawh chhuah theihna tur sector a nih thu a sawi bawk a ni. 

Agra Metro project hi official-te'n an sawi dan chuan tualchhung mi maktaduai 2.5 velin an chhawr thei dawn a, monu­ment, rail station leh bazar lian zawkte awlsam zawka pawh theihna tur a ni tel bawk. Hei hian tourism sector-ah hmasawnna a thlen an beisei.

Uttar Pradesh Metro Rail Corporation (UPMRC) chuan Agra Metro Rail Project thawh khatna hi December 2022-ah zawh hman an inbeisei a, hemi atan hian Rs vbc  8379.62 an ruahman.